ياصديقي كفى لومـك كفانـي
والله انه ورى صدري حكايـا
من زماني خذيت اللي عطاني
كـف الايـام ماقصرمعايـا
صدمة اقراب وصحيبٍ اناني
وحمل ماشالته حتى المطايـا
لو تبسمت واتقنـت المعانـي
وسط صدري من الدنيا خفايا
كل مارحت ينطحني زمانـي
لين مات الامل بيـن الحنايـا
خالي الجيب والدين اقتفانـي
وين ابـروح يافقـر القرايـا
بس انا لوسهم وقتي رمانـي
شامخٍ فـوق بعيـون البرايـا
ماترجيت غير اللـي يرانـي
معطي الناس من جزل العطايا
يشبح الشوف لسهيل اليمانـي
ماجذب ناظري ظلم الزوايـا
من زمان التعب بعت الاماني
اتجاهـل عناويـن الوصايـا
لين بات الامل مثل الثوانـي
يسرق العمر لعيـون المنايـا
ياصديقي ترى صمتي حكاني
لين الافواه ردت من ورايـا
